ХОЛАНЃАНИТЕ ДОБИВААТ СОВЕТ – Време е на кризни состојби, чувајте резерви на храна и готовина за три дена
Целта е зајакнување на подготвеноста на домаќинствата во кризни ситуации
Холандската централна банка им препорача на граѓаните да имаат издвоена готовина доволна за покривање на основните трошоци за најмалку три дена, во случај електронските системи за плаќање привремено да престанат да функционираат. Според препораката, се советува чување на околу 70 евра по возрасен и 30 евра по дете.
Од Банката посочуваат дека ваквата мерка е поттикната од сè поголемата закана од сајбер напади, особено во услови на зголемени геополитички тензии. Како пример за потенцијален ризик, се наведува затемнувањето што во април ги погоди Шпанија и Португалија, кое предизвика сериозни, но краткотрајни нарушувања во платните системи.
Препорачаната готовина треба да ги покрие минималните животни потреби за период од три дена, како што се вода, храна, лекови, превоз и други основни трошоци.
Централната банка упати и апел до трговците да обезбедат алтернативни начини на плаќање, меѓу кои и скенирачки QR-кодови, за ситуации кога ПОС терминалите не се во функција.
Овие насоки доаѓаат во период кога Европската комисија повторно ја истакна препораката граѓаните да располагаат со резерви на храна за најмалку три дена, со цел подобра подготвеност за кризни состојби како војни или природни катастрофи. Оваа мерка е дел од пошироката европска стратегија за зајакнување на отпорноста на домаќинствата во вонредни ситуации.
