ХАОС НА НЕБОТО – Штрајкот на пилотите на „Луфтханза“ ги парализира летовите низ Европа
Патниците се советуваат да ги проверат летовите пред поаѓање
Пилотите на германската авиокомпанија „Луфтханза“ започнаа дводневен протест кој предизвикува сериозни нарушувања во воздушниот сообраќај.
Штрајкот ги опфаќа пилотите на матичната компанија, како и на „Луфтханза Карго“ и „Луфтханза Ситилајн“, и започна веднаш по полноќ, со траење од 48 часа.
Во рамки на „Евровингс“, откажувања и доцнења се очекуваат кај сите летови што поаѓаат од германските аеродроми во текот на денешниот ден.
Според најавите, стотици летови ќе бидат одложени или откажани во текот на денес и утре, при што најпогодени ќе бидат главните транспортни центри во Франкфурт и Минхен. Ова претставува четврти бран индустриски акции во рамки на компанијата од почетокот на годината.
Само минатата недела, еднодневен штрајк на кабинскиот персонал доведе до масовни откажувања на летови.
Протестот е организиран од синдикатот „Ферајнигунг Кокпит“ и се однесува на барањата за повисоки плати, подобри пензиски услови и надоместоци во подружницата „Ситилајн“.
Од „Луфтханза“ оценуваат дека најавениот штрајк претставува дополнително заострување на конфликтот меѓу страните. Летовите кон одредени дестинации на Блискиот Исток засега не се опфатени со штрајкот.