ГРУПА ОД 28 ЗЕМЈИ БАРА ИТЕН ПРЕКИН НА ВОЈНАТА ВО ГАЗА Сите заедно ја осудија израелската блокада на помошта
Според ОН, хуманитарните коридори се на раб на колапс, додека илјадници цивили остануваат без храна, вода и медицинска помош.
Министрите за надворешни работи од 28 држави, меѓу кои се Франција, Велика Британија, Канада и Јапонија, со заедничка изјава побараа непосреден прекин на воените дејства во Газа и изразија загриженост поради ограничувањата што ги наметнува Израел врз хуманитарната помош.
Во изјавата се посочува дека состојбата на теренот е критична, а начинот на кој се доставува помошта доведува до дополнително страдање и загуба на животи. Потписниците го осудија „капка-по-капка“ моделот на испорака и повикаа на итен пристап за ОН и хуманитарните организации.
Покрај тоа, земјите бараат ослободување на сите заложници што сè уште се држат од страна на Хамас и предупредуваат дека секој обид за присилно раселување на палестинското население претставува сериозно кршење на меѓународното право.
