ГРАЃАНИТЕ СЕ ПОВЕЌЕ ПЛАЌААТ ДИГИТАЛНО – мобилните апликации во подем
Повеќе од 70% од овие трансакции се извршени преку мобилни апликации, потврдувајќи дека мобилниот телефон станува омилен алат за секојдневно плаќање.
Најновите податоци од Народната банка покажуваат значителен пораст на дигиталните плаќања во првите три месеци од 2025 година, што укажува на континуираната трансформација на платниот систем кон современи, брзи и практични решенија.
Бројот на електронски плаќања преку интернет и мобилни телефони е зголемен за 13%, додека нивната вредност скокнала за над 30%. Повеќе од 70% од овие трансакции се извршени преку мобилни апликации, потврдувајќи дека мобилниот телефон станува омилен алат за секојдневно плаќање.
И платежните картички бележат раст – бројот на трансакции е зголемен за 1,1%, а вредноста за 8,6%. Овој тренд е поттикнат од сѐ почестото онлајн купување (раст од 7,1%), но раст има и кај физичките плаќања во продавниците.
Иако расте бројот на платните налози (2,7%), особено се забележува скок во нивната вредност (17,7%), што укажува на зголемена доверба и користење на дигиталните канали и за повисоки суми.
Овие резултати јасно укажуваат дека граѓаните сѐ повеќе го преферираат дигиталниот начин на плаќање – како побрз, поедноставен и достапен метод во секојдневниот живот.
