ГРАЃАНИТЕ МАСОВНО СЕ ВАКЦИНИРААТ ПРОТИВ ГРИП – 22 илјади вакцинирани, 70 илјади пријавени
Во координација со Министерството, превентивни тимови од здравствените установи низ земјата спроведуваат и теренска вакцинација, вклучително и во домашни услови, за постари, неподвижни лица и лица со попреченост
Министерството за здравство соопшти дека интересот за вакцинација против сезонскиот грип постојано расте. Досега се пријавиле над 70.000 граѓани, а повеќе од 22.000 веќе се вакцинирани низ државата.
Вакцинацијата се спроведува на вкупно 35 вакцинални пункта, од кои пет се лоцирани во Скопје. Заинтересираните граѓани можат да закажат термин преку апликацијата vakcinacija.mk или преку својот матичен лекар.
Бесплатната вакцинација е наменета за ризичните категории население – лица постари од 65 години, пациенти со хронични заболувања, здравствени работници, бремени жени, деца на возраст од 6 месеци до 5 години, како и лица сместени во установи за социјална заштита и вработените во нив.
Во координација со Министерството, превентивни тимови од здравствените установи низ земјата спроведуваат и теренска вакцинација, вклучително и во домашни услови, за постари, неподвижни лица и лица со попреченост.
