ГЛАВНО ПРАШАЊЕ ЗА ЗЕЛЕНСКИ – Што ќе сторат партнерите ако Русија повторно ја нападне Украина

Украинскиот претседател Володимир Зеленски изјави дека нема унифициран став меѓу Украина, Русија и САД околу ситуацијата во Донбас. Киев инсистира на склучување посебен договор за безбедносни гаранции од западните сојузници, особено од Соединетите Американски Држави.

Одговарајќи на прашања за планот на САД за прекин на војната, Зеленски рече дека предложените елементи бараат дополнителни дискусии поради бројни „чувствителни прашања“, вклучително безбедносни гаранции и контрола над источните региони, објави Блумберг. Тој истакна дека дури и за региони како Донецк и Луганск нема единствен став.

Во одговор на изјавата на американскиот претседател Доналд Трамп дека е разочаран што Зеленски сè уште не го прочитал предлогот, украинскиот претседател нагласи дека главното прашање за него и за граѓаните на Украина е што ќе сторат сојузниците ако Русија повторно започне војна.

Денес Зеленски ќе се сретне во Лондон со британскиот премиер Кир Стармер, германскиот канцелар Фридрих Мерц и францускиот претседател Емануел Макрон за да разговараат за американскиот предлог. Дополнително, ќе има средби со генералниот секретар на НАТО Марк Руте, претседателката на Европската комисија Урсула фон дер Лајен и претседателот на Европскиот совет Антонио Коста.