ГЕРМАНИЈА СО НАЈВИСОК СКОК НА ЦЕНИТЕ НА ГОРИВАТА – Владата ги обвинува нафташите, а тие владата за високи акцизи и даноци

Германија е особено погодена од зголемувањето на цените на бензинот во споредба со остатокот од ЕУ. Работна група формирана од германската влада се обидува да ги спречи прекумерните поскапувања и да ги разоткрие можните манипулации од нафтените компании.

Ескалацијата на конфликтот во Иран доведе до раст на цените на горивата низ цела Европа, но во Германија зголемувањето е далеку над просекот и бензинот пораснал речиси 5% во последните недели. Според податоците на Европската комисија, најголеми скокови имаат Германија, Холандија, Данска и Финска.

Во моментов, Холандија има најскап бензин во Европа со просечна цена од 2,17 евра по литар, а Германија следи со 2,08 евра. Во Финска дизелот е исто толку скап како бензинот.

Главната причина е високата даночна и акцизна стапка во Германија, вклучувајќи дополнителен данок на емисии на CO2, што го зголемува конечниот трошок за возачите. Во други земји од ЕУ, ДДВ-то и акцизите се структурно пониски.

Германската влада сега бара решенија од другите членки на ЕУ. Некои земји веќе воведоа ограничувања на цените како што е во Хрватска со ограничување на бензинот на 1,50 евра по литар од 23 март, Унгарија со цена на бензин 1,51 евра, дизел 1,59 евра, но само за домашни жители и Австрија каде бензинските пумпи можат да ги зголемуваат цените само еднаш дневно, намалувањата се дозволени во секое време.

Министерката за економија, Катерина Рајхе, критикуваше дека цените растат брзо, а паѓаат полека, и предложи ограничување што би овозможило дневно регулирање на цените.

Работната група, предводена од Сеп Милер, обвини нафтени компании за „прекумерно зголемување на цените“. Истражувањето на Ханделсблат покажува дека компаниите често ги користат кризите за брзо покачување на цените, а професорот по економија Фердинанд Фихтнер потврди дека сегашниот скок не може да се објасни само со цената на нафтата.

Германските раководители на BP и Shell, претставници на Федералната канцеларија за картели, индустријата, здруженија на потрошувачи и ADAC присуствуваа на состанокот. Нафтената индустрија ги отфрли обвинувањата, тврдејќи дека маржите не се променети и дека повеќе од половина од цената на горивото се даноци и акцизи.

Индустријата предупреди дека политичко мешање во цените може да ја наруши конкуренцијата и повика на решавање на проблемот преку даночните и државните компоненти на цената, а не преку ограничување на компаниите.