ФРАПАНТНИ ПОСЛЕДИЦИ ОД БЛОКАДИТЕ НА ПРЕВОЗНИЦИТЕ – Дневна штета од 92 милиони евра, стопирано 93% од извозот во Западен Балкан

Претседателот на Српската стопанска комора, Марко Чадеж, изјави дека блокадите на товарните терминали на граничните премини со Европската Унија го стопирале 93% од извозот од регионот, предизвикувајќи дневна штета од околу 92 милиони евра (приближно 110 милиони долари).

Тој истакна дека ефектот не се чувствува само во локалните компании, туку и во фирмите со седиште во ЕУ кои работат во регионот или извезуваат таму.

„За секоја компанија, ова значи дневни загуби од 10.000 до 50.000 евра, бидејќи не можат да ги достават своите стоки до клиентите“, рече Чадеж.

Србија веќе побарала состанок со Европската комисија за да се разговара за решенија, како што се специјални визи или дозволи за возачи.

Транспортерите од Србија и Босна и Херцеговина продолжуваат со блокадите веќе петти ден, додека блокадите во Црна Гора и Северна Македонија беа укинати по објавувањето на новата визна стратегија на ЕУ, која има за цел да го реши проблемот со ограничувањето на престојот за професионалните возачи во Шенген-зоната.

Возачите предупредија дека примената на правилото „90 дена престој во рок од 180 дена“ ја загрозува нивната работа и опстанокот на транспортните компании во регионот.

Според новата визна стратегија на ЕУ, професионалци од трети земји, како што се возачи на камиони, уметници на турнеја, спортисти, експерти на прекугранични проекти и други работници што го поддржуваат индустрискиот и услужниот сектор на ЕУ, ќе можат да остануваат подолго од дозволениот лимит без намера за постојан престој.

Документот нагласува дека ЕУ ќе соработува со земјите-членки за да обезбеди практични решенија за продолжени кратки престои, со цел да се постигне правна јасност за патниците и економски придобивки за Унијата.

Моментално, правилата на ЕУ дозволуваат престој во Шенген-зоната до 90 дена во рок од 180 дена, а за подолг престој е потребна долгорочна виза или дозвола за престој од земјата-членка.