Претседателката на Европската комисија Урсула фон дер Лајен денеска изјави дека „Западот каков што го знаевме повеќе не постои“, говорејќи за промените што се случија после промената на власта во САД и претседателствувањето на Доналд Трамп.
Во интервју за Цајт, таа ја повтори поддршката за европската регулација на американските дигитални услуги дури и при заканите за укинување на американскиот нуклеарен чадор, нагласувајќи дека во Европа „олигарсите“ не одлучуваат за правилата.
Фон дер Лајен, сепак, ги пофали односите САД-ЕУ, а истовремено ги повика земјите да произведуваат и купуваат повеќе во Европа, особено кога станува збор за клучните одбранбени резерви.
Во однос на европската безбедност, Фон дер Лајен исто така предупреди дека „додека (рускиот претседател Владимир) Путин може одвреме-навреме да паузира, нема ограничувања за неговите империјални амбиции“.
Откако беа воведени новите американски царини на 2 април, бран на несигурност ја зафати трансатлантската трговија, при што ЕУ бара нови начини за продлабочување на врските со другите големи економии, како што е кинеската, објави Политико.
