ФИЛИПЧЕ – СДСМ победи во три, води во уште девет општини
За резултатите во Град Скопје, Филипче истакна дека ќе ги почека конечните податоци за да биде прецизен.
Лидерот на СДСМ, Венко Филипче, на прес-конференција соопшти дека партијата победила во три општини – Крива Паланка, Кривогаштани и Богданци, а во моментов води во уште девет, меѓу кои Центар, Пробиштип, Чешиново-Облешево, Чучер Сандево, Валандово, Лозово и Ранковци.
За резултатите во Град Скопје, Филипче истакна дека ќе ги почека конечните податоци за да биде прецизен.
Тој нагласи дека не е изненаден од досегашните бројки. Иако, како што рече, не се во целост оние на кои партијата се надеваше, сепак СДСМ добила поддршка од поголем број граѓани во повеќе општини, а на одредени места бројот на гласови е зголемен.
Според него, имајќи ги предвид околностите, резултатот не е лош и сè уште има општини во кои исходот е неизвесен.
„Имавме инструменти и начин да допреме до голем број граѓани, да ги претставиме нашите кандидати и програмата,“ изјави претседателот на СДСМ Венко Филипче.
Тој апелира граѓаните да излезат масовно на гласање во вториот круг.
