ЕУ ВОВЕДУВА ДРАСТИЧНИ МЕРКИ – Работа од дома и пар-непар возила за да преживееме во енергетската криза

Европската комисија подготви сет мерки за справување со нафтената и енергетската криза предизвикана од војната на Блискиот Исток, кои ќе ги испрати до земјите членки како препораки од Меѓународната агенција за енергија. Мерките вклучуваат работа од дома каде што е можно, намалување на ограничувањето на брзината на автопатите за 10 км/ч, воведување систем на пар-непар возила, како и потикнување на користење на јавен превоз и споделување на превоз со приватни возила.

Комесарот за енергија, Ден Јоргенсен, истакнува дека кризата нема да биде кратка дури и ако утре биде договорен мир, бидејќи енергетската инфраструктура во регионот е сериозно уништена и продолжува да се уништува.

Цената на гасот во ЕУ од почетокот на конфликтот пораснала за околу 70%, а на нафтата за 60%, што за еден месец значело дополнителни трошоци од 14 милијарди евра за увоз на фосилни горива. Меѓутоа, нафтата од типот Брент, која на почетокот на неделата достигна 115 долари за барел, денес се движи околу 100 долари, по изјавата на Доналд Трамп дека САД ќе се повлечат од Иран за две до три недели.

Претседателот Трамп објаснува дека повлекувањето е мотивирано со безбедносни причини и дека откако американските сили ќе заминат, ситуацијата околу Ормутскиот теснец веројатно ќе се стабилизира. Нападите на САД и Израел врз Иран започнаа на 26 февруари, по што Иран го затвори Ормутскиот теснец, заглавувајќи илјадници танкери со нафта и други производи, што предизвика глобална енергетска криза.