ЕСКАЛАЦИЈА НА КОНФЛИКТОТ – Иранската војска ја нападнала најголемата база на САД на Блискиот Исток
Иранските сили тврдат дека користеле беспилотни летала за напад врз американската база Ал Удеид.
Денеска, иранската војска соопшти дека започнала напад врз воздухопловната база Ал Удеид во Катар, каде се сместени околу 10.000 американски војници и која служи како главен напреден штаб на Централната команда на САД (CENTCOM).
„Деструктивни борбени беспилотни летала на копнените, воздушните и поморските сили ги таргетираа воените области на ционистичкиот режим и базата на американските сили во Ал Удеид“, се наведува во соопштението на иранската војска.
Немаше непосредни извештаи за жртви или штети во базата. Сепак, според објави на социјалните медиуми, напредниот радар за рано предупредување AN/FPS-132 (UEWR), кој е најголемиот и најмоќен американски радар во регионот, бил погоден од беспилотно летало „Шахед“.
Војната започна во саботата, по смртоносните воздушни напади на САД и Израел врз Иран, и брзо се прошири низ целиот регион.
Али Мохамад Наини, портпарол на Корпусот на Исламската револуционерна гарда (ИРГЦ), изјави за иранската државна телевизија:
„Портите на пеколот ќе се отвораат сè повеќе, момент по момент, пред САД и Израел“.
Се очекува американско-израелските напади, во кои досега според иранската Црвена полумесечина загинале стотици луѓе во Иран, да траат до четири недели. Сепак, американскиот претседател Доналд Трамп предупреди дека конфликтот може да трае „многу подолго“.
Американските власти во јануари наредија евакуација на „стотици војници“ од Ал Удеид како превентивна мерка поради ескалацијата на тензиите, но подоцна неименуван американски функционер негираше дека имало голема евакуација.
