ЕДИНСТВО ИЛИ НЕШТО ПОВЕЌЕ – Путин му испрати моќна порака на Лукашенко
Путин ја нагласи тридецениската успешна интеграција меѓу Русија и Белорусија.
Претседателот на Русија, Владимир Путин, му упати честитка на белорускиот претседател Александар Лукашенко по повод Денот на единството на народите на Русија и Белорусија, истакнувајќи ја плодната соработка помеѓу двете земји.
„Во трите децении од потпишувањето на Договорот за формирање на Заедницата на Русија и Белорусија, постигнавме значаен напредок во развојот на меѓусебно корисни интеграциски врски и успешна билатерална соработка“, се наведува во телеграмата на Путин објавена на веб-страницата на Кремљ.
Рускиот претседател изрази уверување дека спроведувањето на мерките договорени на седницата на Врховниот државен совет на Федералната држава е во интерес на граѓаните на двете земји, кои уживаат исти права и можности на целата територија на сојузната држава.
„Москва и Минск ги координираат клучните параметри на макроекономската, монетарно-кредитната и социјалната политика, како и заедничките напори во меѓународните прашања, одбраната и безбедноста“, изјави Путин, посакувајќи им просперитет и напредок на белорускиот народ.