ЕДЕН ЧАС Е ДОВОЛЕН – Шокантна изјава на Трамп за можен напад врз Иран

Американскиот претседател Доналд Трамп изјави дека САД распоредиле миночистачи во Ормутскиот теснец, зголемувајќи ја безбедноста во еден од најважните светски енергетски коридори.

„Имаме високософистицирани подводни миночистачи – најнови и најдобри. Но внесуваме и традиционални“, рече Трамп во интервју за Fox News.

Тој додаде дека Велика Британија и други сојузници се приклучуваат на операцијата, потенцирајќи дека мал број држави располагаат со вакви капацитети.

Во исто време, Трамп остро го критикуваше Иран, обвинувајќи го дека наплаќа за премин на бродови низ теснецот и дека селективно тргува со нафта.

По неуспешните разговори меѓу САД и Иран во Исламабад, американскиот лидер повторно упати остри закани.

„Можам да го уништам Иран за еден ден… можеби и за еден час. Нивната енергетска инфраструктура – фабрики, електрани сè би било погодено“, изјави Трамп.

Тој нагласи дека таква акција би имала долгорочни последици за земјата.

Тој посочи дека потенцијални цели би можеле да бидат електричната мрежа, постројките за десалинизација и мостовите, оценувајќи дека тоа би имало „разорно влијание“.

Сепак, Трамп разговорите ги опиша како „многу пријателски“, додавајќи дека САД постигнале речиси сè што барале освен клучното прашање: нуклеарните амбиции на Иран.

„Тие одбиваат да се откажат од својата нуклеарна програма, а тоа е најважното“, истакна тој.

Американскиот претседател тврди дека неговите остри изјави, вклучително и предупредувањето дека „цела цивилизација може да исчезне“, го принудиле Техеран да седне на преговарачката маса.

Дополнително, Трамп потврди дека американски воени бродови веќе поминале низ Ормутскиот теснец, во услови на кревко примирје.

Во однос на Кина, тој рече дека не верува оти испорачува оружје на Иран, но предупреди дека во спротивно САД би вовеле царини од 50 проценти.

Трамп на крајот оцени дека цените на нафтата и гасот може да бидат „малку повисоки“ или „приближно исти“ во периодот пред изборите во САД.