ЌЕ ГО НАДЖИВЕАМ ПУТИН – Не му останува многу време

Лидерот на Украина, Владимир Зеленски, во интервју за „Политико“ изрази загриженост дека САД испраќаат пораки кои сугерираат дека токму Украина треба да направи компромис, а не Русија.

„Постојат одредени сигнали од американската страна, од претседателот Трамп, кои велат:

‘Сега е време за компромис, можете да направите неколку чекори напред’. Направивме многу компромиси“, изјави Зеленски.

Тој додава дека ваквата позиција е погрешна и го загрижува тоа што Белата куќа „наводно ја промашува поентата“.

Зеленски ја повика администрацијата на Трамп да врши „притисок врз Русија“ и да го прекине конфликтот, истакнувајќи дека само Вашингтон има капацитет за тоа.

И покрај тешката ситуација во Украина, каде што делови од земјата се без електрична енергија и греење на температури под нулата, Зеленски останува уверен дека Украина ќе го „надживее“ Путин:

„Јас сум помлад од Путин и тоа е важно, нему не му останува многу време“, рече тој.

Во интервјуто, Зеленски ја намали важноста на средбите на Киев со Русија и САД за конфликтот, нарекувајќи ги „технички“, што го натера да се извини на својата делегација:

„Она што го направија Американците, она што го направи тимот на Џаред и Стив, тимот на Трамп ги охрабрија Русите на трилатерални преговори на ‘техничко ниво’. Се извинувам на мојот тим… Тие се пријатели, но не се тука, затоа техничкото ниво е во ред“, се обиде да се пошегува Зеленски.

Претходно, „Њујорк тајмс“ објави дека американската администрација го зголемува притисокот врз Украина да направи отстапки по прашањето за Донбас и да го заврши конфликтот до почетокот на летото.

Американскиот претседател Доналд Трамп истакна дека Зеленски не треба да ја пропушти шансата да постигне договор со Русија за решавање на конфликтот, предупредувајќи дека во спротивно Украина ќе „пропушти одлична можност“.