ДВА АКТИВНИ ПОЖАРИ УТРОВО ВО ЗЕМЈАВА – Изгаснати 18, еден под контрола

Едниот од активните пожари е лоциран во Велешко, кај селата Џидимирци, Крушје и Иванковци, каде што гори мешана шума. Вториот пожар е во Општина Македонски Брод, во атарите на селата Црешнево, Локвица, Крапа и Слатина, каде што се зафатени деградирана дабова шума, грмушки и ниска вегетација.

Според податоците од ЦУК, овие пожари се уште активни и на терен се ангажирани надлежни служби кои работат на нивно локализирање и гаснење.

Под контрола е ставен пожарот кај дојранското село Николиќ, каде што гореше нискостеблеста шума. Интервенцијата била навремена и спречено е негово проширување.

ЦУК информира дека вчера и ноќта спроти денешниот ден се изгаснати вкупно 18 пожари на отворен простор. Меѓу нив:

Скопски регион:

• Општина Чучер Сандево – село Горњани и локација над црквата Св. Троица кај село Чучер (нискостеблеста и мешана шума)
• Општина Гази Баба – Смилковско Езеро и делот меѓу село Раштак и Љуботен (ѓубре)
• Општина Сарај – селата Љубин и Крушопек према Лака (ѓубре)
• Општина Кисела Вода – бул. „Борис Трајковски“ (градежен отпад)

Југозападен и Пелагониски регион:

• Општина Битола – населба Баир (ѓубре)
• Општина Долнени – село Црнилиште (депонија) и село Слепче (ниска вегетација)
• Општина Кичево – ул. Прилепска (дива депонија)
• Општина Струга – село Враништа (стрниште)

Источен и Североисточен регион:

• Општина Штип – Лакавички пат (ниска шума и вегетација)
• Општина Пробиштип – село Петршино (ниска вегетација)
• Општина Куманово – села Четирце и Пчиња (ниска вегетација)
• Општина Кратово – село Туралево (грмушки и ниска вегетација)
• Општина Теарце – село Слатино (ѓубре и ниска вегетација)

Надлежните апелираат до граѓаните да внимаваат при престој во природа и да не палат оган на отворено, бидејќи високите температури и сувата вегетација значително го зголемуваат ризикот од пожари. Секое забележано палење или чад треба веднаш да се пријави на бројот 112 или до најблиската противпожарна единица.