ДОНБАС ПОД ПРАШАЛНИК – Зеленски постави еден услов за повлекување

Претседателот на Украина, Володимир Зеленски, изјави дека украинските вооружени сили би можеле да се повлечат од Донбас исклучиво доколку Русија преземе идентични чекори.

Според Зеленски, секое евентуално повлекување мора да биде симетрично и договорено.

„Кога се повлекуваат војници, тоа секогаш мора да биде огледално. Ако ние се повлечеме пет километри, тие се повлекуваат пет. Ако ние десет, тогаш и тие десет. Потоа може да се формира демилитаризирана зона“, изјави украинскиот претседател.

Тој додаде дека таквата зона би можела да добие посебен статус, како на пример слободна економска зона, доколку се обезбедат соодветни услови и преференции, но нагласи дека процесот мора да биде внимателно разгледан.

Зеленски оцени дека „најправедната опција“ во моментов е страните да останат на сегашните позиции, бидејќи тоа подразбира најмалку компромиси за двете страни.

Во однос на можноста за воспоставување слободна економска зона, тој нагласи дека украинските партнери се предупредени оти за такво прашање мора да се изјасни украинскиот народ.

Да потсетиме, во првата половина на декември, Зеленски не ја исклучи можноста за одржување референдум за повлекување на украинските трупи од деловите на Донбас под контрола на Киев. Сепак, украински пратеници, во изјави за „Политико“, изразија сомнеж дека парламентот би го поддржал таквиот предлог.

Од друга страна, Кремљ соопшти дека не ја исклучува можноста за заемно повлекување на украинските и руските сили од регионот.

Сепак, помошникот на рускиот претседател, Јуриј Ушаков, изјави дека Руската национална гарда и руската полиција ќе останат присутни во Донбас.

„Сè што е потребно за одржување на редот и организирање на секојдневниот живот ќе биде таму“, рече Ушаков, додавајќи дека прекин на огнот е можен само по целосно повлекување на украинските вооружени сили и дека, според руската позиција, регионот со текот на времето ќе дојде под целосна руска контрола.