DISCORD ИЗВЕСТИ ЗА ХАКЕРСКИ НАПАД Цел бил еден од нејзините соработници

Платформата за комуникација Discord објави дека еден од нејзините соработници станал цел на хакерски напад. Според компанијата, „неовластена страна“ успеала да пристапи до ограничен број кориснички податоци на лица кои контактирале со тимот за поддршка или тимот за безбедност и доверба.

Целта на напаѓачите била финансиска, обидувајќи се да изнудат откуп од Discord, но компанијата нагласува дека хакерите не навлегле директно во нејзиниот систем. Потенцијално компромитираните информации вклучуваат имиња, кориснички имиња, е-адреси, последните четири цифри од броевите на кредитните картички, како и ограничен број слики од лични документи на корисници кои поднеле жалба за погрешно пресметување на возраста.

Discord потврдува дека целосните броеви на картичките и лозинките не се компромитирани. Компанијата веќе ги известува засегнатите корисници преку е-пошта, при што секој корисник ќе биде информиран дали неговите лични информации се компромитирани.

Овој инцидент ја потенцира важноста од внимателно ракување со личните податоци и потребата од дополнителна заштита на онлајн профили.