ДЕНЕС СЕ СЛАВИ АРХАНГЕЛ МИХАИЛ Небесниот војвода и заштитник на верниците
Народот го претставува Архангел Михаил како водачот на небесните сили и првиот бранител од злото и ангел што ја носи душата кон небото
Архангел Михаил се смета за водач на небесните сили и заштитник на земјата. Според црковните преданија, тој секогаш се јавувал на местата каде што се појавувала Богородица, носејќи небесна помош и заштита. Во духовната традиција, Архангел Михаил е првиот што застанал во борба против злите духови, симболизирајќи ја силата „која е како Бог“.
Неговото име потекнува од грчките зборови „архи“ – главен, прв, и „ангелос“ – весник, ангел. На иконите е претставен како небесен војвода, со меч или копје во раката. Народните верувања додаваат дека тој ја зема човечката душа кога ќе дојде часот, а болните ги посетува за да го покаже исходот на нивната состојба – ако стои кај нозете, се верува дека исходот е лош, а ако стои кај главата – дека ќе оздрават.
Празникот на Св. Архангел Михаил се слави есен, на 21 ноември. Според народното предание, кога светците ги делеле своите улоги, Михаил го добил есенскиот и зимскиот период – времето на студ и неволји. Се верува и дека во овој период архангелот талка по светот облечен како сиромав, за да ги укори неверниците и да им помогне на страдалниците.
Постои и народно правило дека времето на Аранѓеловден го предскажува времето за целата зима и пролет: какво е времето на овој ден, такво ќе биде и во следните месеци. Во одредени краишта празникот се смета и за заштита на сточарите, бидејќи само Архангел Михаил можел да ги истера волците.
Иако кај некои семејства постои обичај да не се подготвува пченица за оваа слава, верското правило е јасно – пченица треба да има, бидејќи сите светители се живи пред Бога, па така и славата бара традиционална подготовка.
На овој ден се истакнува потребата да им се помогне на сиромашните, слабите и на оние во неволја со храна, пиење или топол збор. Се верува дека Архангел Михаил ги слуша и наградува оние кои покажуваат добрина и милосрдие.
Св. Архангел Михаил е една од најчестите куќни слави кај христијаните во месец ноември. Оваа година празникот паѓа во петок, па затоа славата е мрсна. Правилото е дека ако празникот се падне во среда или петок, славата се држи посно, а во сите други денови може да биде мрсна.