ДАЛАЈ ЛАМА – Наградата „Греми“ признание за универзалната одговорност

Будистичкиот духовен водач, Далај Лама, изјави во понеделник дека е благодарен за својата прва награда „Греми“. Тој ја доби престижната музичка награда за аудиокнигата и раскажувањето на приказни.

Харизматичниот 90-годишник, кој живее во егзил во Индија, е пофален низ целиот свет за својата неуморна кампања за поголема автономија на Тибет, за кој Пекинг тврди дека е дел од Кина.

Далај Лама ја освои наградата Греми во Лос Анџелес за својата аудиокнига „Медитации: Размислувања на Неговата Светост Далај Лама“.

„Го прифаќам ова признание со благодарност и понизност“, напиша тој на социјалните мрежи.

„Не го гледам како нешто лично, туку како признание за нашата заедничка универзална одговорност.“

Во својата костенлива мантија, едноставни сандали и очила со широк раб, Далај Лама е невообичаена глобална ѕвезда.

„Искрено верувам дека мирот, сочувството, грижата за нашата животна средина и разбирањето на единството на човештвото се неопходни за колективната благосостојба на сите осум милијарди луѓе“, додаде тој.

Аудиокнигата ја реализираа уметници како Руфус Вејнрајт, кој ја прими наградата во име на духовниот водач, и Меги Роџерс.

Далај Лама имал само 23 години кога побегнал од тибетската престолнина Ласа, поради страв за својот живот, откако кинеските трупи го задушиле востанието во 1959 година. Тој никогаш не се вратил во родната земја.

Добитникот на Нобелова награда за мир вели дека му остануваат уште многу години живот, но Тибеќаните се подготвуваат за неизбежната иднина без него. Тибетските будисти веруваат дека тој е 14-та реинкарнација на духовен лидер, чие прво раѓање било во 1391 година.

Кина, која се смета за атеистичка и комунистичка држава, го осудува Далај Лама како бунтовник и сепаратист и минатата година изјави дека мора да го одобри неговиот евентуален наследник. Далај Лама, меѓутоа, тврди дека само неговата канцеларија во Индија има тоа право.

His Holiness the Dalai Lama Receives Grammy Recognition Highlighting Universal Responsibility and Compassion

Grammy Award Best Audiobook Narration – Meditations: The Reflections of His Holiness the Dalai Lama.

I receive this recognition with gratitude and humility. I don’t see… pic.twitter.com/YhK5zlyhem

— Dalai Lama (@DalaiLama) February 2, 2026