ЦЕНОВЕН ШОК НА ОХРИДСКО ЛЕТО рекордните цени предизвикуваат поделени реакции меѓу туристите

Туристичката сезона во Охрид започна со рекордно високи цени, што предизвикува реакции кај домашните, но и кај дел од странските туристи.

Според извештаите, обично кафе покрај езерото ова лето чини најмалку три евра, сладолед се продава по 80 до 120 денари за топче, додека просечна пица во ресторан изнесува околу осум евра. Цената на најевтиниот коктел достигнува 400 денари, а охридската цреша се продава и до 300 денари за килограм.

Домашните туристи реагираат на високите цени
Многу домашни посетители ги оценуваат цените како претерани и несоодветни на македонскиот животен стандард. Велат дека сè помалку семејства можат да си дозволат повеќедневен одмор на домашен терен, особено во шпицот на сезоната.

Странците поделени
Од друга страна, дел од странските туристи не гледаат проблем.

„Ова место е прекрасно и вреди. Цените не ми се чини дека се високи, слични се на тие во Европа“, вели турист од Колумбија.

Сепак, има и незадоволство – туристички агенции од Холандија и Полска откажале групни аранжмани поради нагло зголемување на цените за хотелско сместување, предупредуваат извори од секторот.

Туристичкиот сектор: Потребна е умереност
Претставници од туристичката индустрија истакнуваат дека, иако сезоната ветува, неконтролираното зголемување на цените може да има долгорочно негативни последици.

„Охрид не смее да стане дестинација само за богатите. Потребна е рамнотежа меѓу квалитет, цена и достапност“, велат угостители и туристички работници.

Сезоната во Охрид допрва влегува во полн ек, а останува да се види дали високите цени ќе влијаат врз бројот на туристи во текот на летото.