БОЈКОТОТ НА САМИТОТ ЕУ-ЗАПАДЕН БАЛКАН Е ЛИЧНО МОЈА ОДЛУКА – Не ја обвинувајте владата
Вучиќ одлучи да ја бојкотира меѓувладината конференција, предупредувајќи дека Србија е блиску до конфликт.
Претседателот на Србија, Александар Вучиќ како што најави не отпатува во Брисел на самитот ЕУ-Западен Балкан, со образложение дека сака да ги заштити интересите на својата земја. Тој нагласи дека Србија сигурно ќе продолжи по европскиот пат, но одлуката за присуство на самитот ја донел лично, за да избегне притисок врз владата.
„За прв пат по 13 или 14 години, ниту јас ниту некој друг нема да одиме на меѓувладината конференција. Србија нема да биде претставена, па Западен Балкан ќе го има без нас. Ова го правам за да нема вина врз никого во владата“, изјави Вучиќ за РТС.
Претседателот истакна дека во изминатите 24 часа разговарал со повеќето европски лидери, вклучително и со претседателите на ЕК Урсула фон дер Лајен, Европскиот совет Антонио Кошта и Франција Емануел Макрон, кои покажале почит кон Србија.
„Она што го правиме, го правиме за граѓаните на Србија. Без оглед на критиките од Брисел, нашата цел е да ги заштитиме националните интереси и да покажеме што сме постигнале“, додаде Вучиќ.
Претседателот посочи дека позицијата на Србија е поддржана од повеќе земји, меѓу кои Шпанија, Италија, Франција, Грција, Кипар, Унгарија, Словачка и Австрија, додека одредени други земји, како Хрватска, Бугарија, Холандија и Шведска, имаат различен став.
Вучиќ предупреди дека ситуацијата е чувствителна и потенцијално близу до конфликт, но истакна дека Србија е на своја страна и нема да се вклучи во војна.
„Сакам граѓаните да се чувствуваат безбедно. Ја зајакнуваме армијата и купуваме нови системи за одвраќање, за да се знае дека напад врз Србија нема да биде изводлив“, нагласи тој.
Во исто време, Вучиќ нагласи дека неговата цел е зачувување на мирот и напредок на економијата, додека идните одлуки за европската интеграција ќе зависат од новиот претседател и новата влада.
