БЛОКАДА НА КУБА – Русија спремна да испрати хуманитарна помош

Русија изјави дека е солидарна со Куба и ќе ѝ обезбеди помош, вклучително и материјална, соопшти рускиот заменик-министер за надворешни работи, Сергеј Рјабков.

„Секако дека се солидаризираме со Куба и веќе работиме на обезбедување помош, вклучително и материјална“, рече Рјабков во интервју за ТАСС.

Тој нагласи дека Русија е подготвена да пружи поддршка и покрај тоа што засега нема план за дејствување преку БРИКС.

„Можни се различни опции, во зависност од развојот на ситуацијата, но засега тоа се прави на индивидуална основа“, додаде тој.

Рјабков истакна дека САД вршат „интензивен притисок“ врз Куба и дека, според неговата проценка, Вашингтон не се двоуми да користи нелегални средства кои го кршат меѓународното право.

ТАСС потсетува дека САД ја обновија блокадата на Куба, воведувајќи ембарго на испораките на гориво и најавувајќи увозни тарифи за земји кои испорачуваат гориво на островот.

Рускиот амбасадор во Хавана соопшти дека Москва наскоро ќе започне со испорака на нафта и нафтени производи како хуманитарна помош.