ШТО НИ КАЖУВА ТЕЛОТО КОГА МУ НЕДОСТАСУВААТ МИНЕРАЛИ – знаци на скриени недостатоци што не смеете да ги игнорирате
Човечкото тело секојдневно испраќа сигнали за својата внатрешна состојба — заморот, мускулните грчеви или недостигот на енергија често не се само моментална слабост, туку знак за дефицит на важни минерали.
Минералите и витамините имаат клучна улога во одржувањето на метаболизмот, енергетската ефикасност, силниот имунитет и целокупниот квалитет на живот. Нутриционистката Кристен Ставридис од Лондон вели дека внесот на овие хранливи материи е од суштинско значење за спречување на болести и за нормално функционирање на телото.
„Минералите го поддржуваат здравиот метаболизам и му помагаат на телото да функционира оптимално. Ни се потребни во мали количини, а можеме да ги добиеме преку разновидна исхрана. За жал, многумина не внесуваат доволно храна богата со витамини и минерали, што води до скриени дефицити“, појаснува Ставридис.
Меѓу најчестите симптоми на недостиг на железо се пукање на аглите на усните, мускулен замор, чешање на кожата, главоболки, вртоглавица и кршлива коса. Недостатокот на магнезиум се манифестира преку губење на апетит, гадење, слабост, дијареа и проблеми со спиењето.
Цинкот е уште еден витален минерал, а неговата дефицитарност се открива преку рапава кожа, одложено зараснување на рани и нарушен вкус. Недостигот на калциум се покажува преку кршливи нокти, несоница и грчеви во мускулите.
Јодот, важен за функцијата на тироидната жлезда, при недостиг може да предизвика отекување на вратот, проблеми во бременоста, опаѓање на косата и сува кожа. Селенот, пак, кога го нема доволно, може да доведе до неплодност, замор и заматена концентрација.
Препораката од стручњаците е редовна и избалансирана исхрана со доволен внес на минерали и витамини, како и навремено препознавање и реагирање на симптомите што телото ги испраќа.
