БУГАРИЈА ЛУТА – Го обвини Мицкоски за непријателство и омраза
Во соопштението, бугарското МНР изразува изненадување од повикувањето на нивниот амбасадор, наведувајќи дека токму од страна на македонските власти доаѓале „систематски и намерни постапки со непочитување“ кон Бугарија.
Министерството за надворешни работи на Бугарија остро реагираше на најновите изјави од македонскиот премиер Христијан Мицкоски, оценувајќи ги како навредливи и непријателски. Повод за реакцијата беше повикувањето на бугарскиот амбасадор во македонското МНР, поради тоа што бугарскиот министер Георг Георгиев го нарекол Мицкоски „северномакедонски премиер“.
Во соопштението, бугарското МНР изразува изненадување од повикувањето на нивниот амбасадор, наведувајќи дека токму од страна на македонските власти доаѓале „систематски и намерни постапки со непочитување“ кон Бугарија. Дополнително, се истакнува дека изјавите на Мицкоски кон министерот Георгиев биле „вулгарни“, „неприфатливи“ и „некомпатибилни со основните норми на дипломатски и политички дијалог“.
Софија исто така потсетува дека бугарските пожарникари во моментов активно помагаат во справување со пожарите во регионот на Крива Паланка и укажува дека ваквиот придонес е доказ за добрососедски намери, спротивно на „непријателската реторика“ од македонска страна.
Бугарија оценува дека ваквите тензични изјави не само што ја нарушуваат кревката доверба меѓу двете земји, туку и ја доведуваат во прашање вистинската посветеност на македонската влада на Договорот за пријателство од 2017 година и на процесот на европска интеграција, кој, како што се наведува, бара „взаемно почитување, одговорност и политичка зрелост“.
Во заклучок, бугарското МНР испраќа јасна порака: „Бугарија нема да толерира јазик на омраза, лични напади и поткопување на билатералните односи“.
