ЛУКСУЗОТ ВО ДУБАИ ЗАВРШУВА НА ОТПАД – суперавтомобили вредни милиони напуштени во пустината

Дубаи одамна е синоним за гламур, луксуз и раскош без граници – од станови и накит, до ресторани и суперавтомобили. Но зад сјајната фасада на најпознатиот емират во Обединетите Арапски Емирати се крие парадоксален феномен: авто-отпади полни со најскапите и најредоките автомобили во светот.

Познатиот јутјубер и автомобилски фотограф Лари Чен неодамна објави видео-репортажа од еден од најлуксузните авто-отпади во светот, сместен во близина на Дубаи. Сцените се зачудувачки – редови на напуштени Lamborghini, Ferrari, McLaren, Lotus, Bentley и Rolls Royce модели, некои од нив речиси недопрени.

Она што најмногу изненадува е фактот дека многу од овие автомобили не се оштетени. Дел од нив се оставени со години, без никаква грижа, често поради финансиски или правни проблеми на сопствениците – најчесто странци кои заминуваат од земјата без да ги подмират казните или долговите. Според проценките, од 2.000 до 3.000 автомобили се напуштаат годишно.

Во вакви случаи, дубајската полиција интервенира – возилата се одземаат и се нудат на јавна лицитација. Постои и добро организиран пазар на делови, каде што карбонски, титаниумски и керамички компоненти од ваквите автомобили наоѓаат нови сопственици низ целиот свет.

Локалните власти и специјализирани компании често соработуваат во организирање на аукции, каде што ентузијасти и трговци можат да купат врвни автомобили по значително пониски цени – понекогаш и за десетина од нивната првобитна вредност.

Во светот на екстремен луксуз, дури и автомобили вредни милиони долари можат да бидат оставени да се распаѓаат во песокот. Дубаи уште еднаш покажува дека зад богатството и сјајот се крие и една поинаква реалност – онаа во која луксузот понекогаш завршува на отпад.