СЕ ЗАТВОРА „АЛ ЏЕЗИРА БАЛКАНС“ – по 14 години регионално медиумско присуство

По четиринаесет години успешно работење, регионалниот телевизиски канал „Ал Џезира Балканс“ ги затвора своите врати, пренесе порталот „Кликс“. Телевизијата, која од 2011 година емитуваше програма од Сараево, беше дел од глобалниот медиумски концерн „Ал Џезира“ со седиште во Доха, Катар.

„Ал Џезира Балканс“ се етаблира како прва телевизиска станица од оваа мрежа што емитуваше програма на јазик различен од арапскиот и англискиот. Со канцеларии во Скопје, Белград, Загреб, Подгорица, Љубљана и Приштина, телевизијата покриваше значаен дел од балканскиот медиумски простор, со фокус на вести, анализи и оригинални документарни содржини.

Во текот на своето функционирање, „Ал Џезира Балканс“ се стекна со углед заради професионалниот пристап и регионалниот објективен поглед врз случувањата, особено во постконфликтните средини.

Официјални причини за затворањето сè уште не се објавени, но се претпоставува дека станува збор за деловна одлука донесена од централата во Доха, најверојатно поради финансиски предизвици и промени во стратегијата на медиумската мрежа.

Затворањето на „Ал Џезира Балканс“ остава забележливо празно место на медиумската сцена во регионот, каде каналот имаше значајна улога во информирањето, поврзувањето и разбирањето меѓу народите.