ПРВИТЕ СЛУЧАИ НА ВИРУСОТ „ЗАПАДЕН НИЛ“ ВО ГРЦИЈА, користете средства против инсекти за телото и просторот

Грчките здравствени власти потврдија четири случаи на инфекција со вирусот Западен Нил во регионот на Атина – Западна Атика, Пиреја и Островите (Аспропиргос, Коридалос и Саламина). Пациентите, сите над 65 години, се дијагностицирани со енцефалитис/менингоенцефалитис и развиле симптоми кон крајот на јуни.

Националната организација за јавно здравје (ЕОДИ) препорачува лични мерки за заштита од комарци: користење репеленти, мрежи, долга облека, отстранување застоена вода, како и посебна претпазливост кај повозрасните и хронично болните лица.

Вирусот се пренесува преку каснување од инфицирани комарци, а кај повеќето заразени лица симптомите се благи или отсуствуваат. Помалку од 1% развиваат тешки невролошки компликации.

Секоја година ЕОДИ спроведува засилен епидемиолошки и ентомолошки надзор, а здравствените работници веќе се предупредени за зголемена будност ова лето.