ЈУБИЛЕЕН КОНЦЕРТ НА „ОРЦЕ НИКОЛОВ“ Вечерва на Скопско лето

Во рамки на фестивалот „Скопско лето“, вечерва со почеток во 20:30 часот на Колонадата пред платото на Националната опера и балет ќе се одржи свечен концерт на Ансамблот на народни песни и игри „Орце Николов“ по повод 80 години од неговото постоење.

Настанот е со слободен влез и претставува чест и благодарност кон генерациите што го одржувале живо македонското фолклорно богатство.

Ансамблот „Орце Николов“ е формиран во 1945 година од Синдикатот на металските работници на аеродромот Скопје и веќе осум децении ја негува и промовира македонската традиционална музика, ора, носии и обичаи. Во својот богат фундус ансамблот поседува над 680 оригинални народни носии од различни етнолошки региони на Македонија.

Концертот ќе понуди сплетови на изворни ора и песни, изведени со препознатливата енергија, уметничка посветеност и автентичност што ги одбележуваат изведбите на „Орце Николов“. Настанот е дел од богатата програма на Скопско лето 2025, кое годинава нуди бројни културни содржини за сите генерации.