ГЛАСАНО СО ТЕСНО МНОЗИНСТВО Трамп го потпиша „големиот прекрасен закон“

Американскиот Сенат вчера со тесно мнозинство го усвои законот за буџет и имиграција, кој американскиот претседател Доналд Трамп го нарече „голем прекрасен закон“. Овој закон ја продолжува примената на даночните олеснувања воведени од Трамп во 2017 година, додава нови олеснувања, зголемува средства за контрола на имиграцијата и воените трошоци, но истовремено носи значителни намалувања во здравственото осигурување, индустријата за чиста енергија, студентските кредити и помошта за храна.

Според извештаите на „Фокс њуз“, законот трајно го продолжува даночниот режим од 2017 година, спречувајќи зголемување на даноците за 22% за американските семејства. Воведени се даночни одбитоци за бакшиши до 25.000 долари и за прекувремена работа до 12.500 долари за средно и високо платени работници. Пензионерите постари од 65 години ќе можат да остварат дополнителен даночен одбиток од 6.000 долари до 2028 година.

Законот го зголемува и ограничувањето за државни и локални даноци на 40.000 долари во наредните пет години, пред да се врати на сегашното ниво од 10.000 долари, што особено ќе им користи на жителите од скапи области, но овој потег предизвика критики како поддршка на прогресивните политики.

Во делот посветен на здравственото осигурување, законските измени предвидуваат намалување на средствата за „Медикејд“, што според „Фокс њуз“ може да доведе до губење здравствена заштита за околу 12 милиони Американци. Дополнително, воведени се построги услови за корисниците, кои ќе мора да работат најмалку 80 часа месечно за да ги задржат бенефициите.

Се предвидува и намалување на финансирањето на Програмата за дополнителна помош за исхрана (SNAP), со воведување на работни услови за возрасни и родители на деца постари од седум години, како и зголемување на одговорноста на државите со повисоки стапки на грешки во плаќањата.

Со цел да се избегне намалување на кредитниот рејтинг на САД, законот предлага зголемување на ограничувањето на националниот долг за пет трилиони долари.

Во изборната кампања, Трамп стави акцент на одбраната и имиграцијата, а законот овозможува милијарди долари за одбранбени проекти, меѓу кои и изградба на систем за противракетна одбрана „Златна купола“ вреден 25 милијарди долари, сличен на израелскиот „Железен купол“. Исто така, предвидено е завршување на ѕидот на границата со Мексико.

Законот воведува и нови такси за мигрантите – 100 долари годишно за барателите на азил и 5.000 долари за оние кои се фатени како нелегално влегуваат во земјата.

По гласањето, кое заврши 50-50, американскиот потпретседател Џ.Д. Венс го искористи својот право на глас и ги одобри амандманите, овозможувајќи законот да биде усвоен.