ПОЖАРОТ ВО ВАЛАНДОВСКО СТАВЕН ПОД КОНТРОЛА Михаилов благодарен до сите ангажирани

Пожарот што вчера попладне околу 14 часот избувна во близина на селото Грчиште, Валандовско, и се закануваше да ги зафати првите куќи, е ставен под контрола – соопшти заменик-директорот на ЈП „Македонски шуми“, Кире Михаилов, на својот фејсбук-профил.

„Повеќе од 60 луѓе од 5 часот наутро се на линијата на огнот и до овој момент можеме да кажеме дека, и покрај сериозноста, целата линија на огнот е покриена. Денот ќе биде жежок и екипите остануваат на терен за внимателно следење на состојбата“, напиша Михаилов.

Тој изрази огромна благодарност до сите ангажирани во справувањето со пожарот:

• вработените од подружниците на „Македонски шуми“ од Валандово, Гевгелија и Струмица (вкупно 26 луѓе),

• противпожарните единици од Валандово, Струмица, Гевгелија, Радовиш и Кавадарци,

• доброволното противпожарно друштво од Валандово,

• шумската полиција од Валандово,

• општинските власти на Валандово,

• и граѓаните и компаниите што доброволно помогнаа во гаснењето.

„Остануваме подготвени за секој нов предизвик кој ќе го донесат човечката несовесност и непредвидливата природа. Благодарност до сите што ни дадоа поддршка – и до оние кои нè критикуваа. Ќе продолжиме да докажуваме дека она што го правиме е исправно“, порача Михаилов.