ЕВЕ ОД КОИ ДРЖАВИ НЕ МОЖЕ ДА ВЛЕГУВААТ ВО САД Трамп со нова забрана за влез во САД за државјани од 12 земји
Ова не е прва ваква мерка од страна на Трамп. За време на неговиот прв мандат, тој воведе слична забрана за седум претежно муслимански земји, што по правни предизвици беше укината од Врховниот суд во 2018 година
Американскиот претседател Доналд Трамп потпиша нов претседателски указ со кој се забранува влез во САД за државјани на 12 земји, наведувајќи ги како потенцијална безбедносна закана. Указот ќе стапи во сила на 9 јуни и, според администрацијата, има за цел заштита од странски терористи и други закани по националната безбедност.
На листата на земји опфатени со целосна забрана се: Авганистан, Мјанмар, Чад, Конго, Екваторијална Гвинеја, Еритреја, Хаити, Либан, Иран, Сомалија, Судан и Јемен. Покрај овие, за државјани од Бурунди, Куба, Лаос, Сиера Леоне, Того, Туркменистан и Венецуела е воведена делумна забрана.
„Отсега ќе им дозволиме влез во земјата само на луѓето кои не сакаат да нè повредат,“ изјави претседателот Трамп, додавајќи дека листата на земји ќе биде периодично ревидирана и може да се проширува во зависност од безбедносната проценка.
Според администрацијата, земјите за кои се воведуваат најстроги мерки се карактеризираат со слаби институции, неможност за верификација на идентитетот на патниците и недостаток на евиденција за криминално минато.
„Не можеме да имаме отворена миграција од земји каде што не можеме сигурно да ги провериме оние кои сакаат да влезат во САД,“ порача Трамп.
Тој се повика и на неодамнешен инцидент во Колорадо, кога египетски државјанин нападна произраелски протест со молотови коктели, како потврда за потребата од построги мерки.
Указот прецизира дека визите издадени пред 9 јуни нема да бидат поништени. Исклучок од забраната ќе важи за учесници, новинари и службени лица поврзани со големите спортски настани што ќе се одржуваат во САД, меѓу кои Светското првенство во фудбал во 2026 и Летните олимписки игри во Лос Анџелес во 2028.
Ова не е прва ваква мерка од страна на Трамп. За време на неговиот прв мандат, тој воведе слична забрана за седум претежно муслимански земји, што по правни предизвици беше укината од Врховниот суд во 2018 година. Неговиот претходник, Џо Бајден, пак, во 2021 воведе ограничувања за неколку блискоисточни и африкански држави, со слична образложение.
