ФИЛИПЧЕ СО ЖЕСТОКА ПОРАКА ПО ИЗБОРИТЕ ВО СРБИЈА Падна Орбан, падна Вучиќ – сите знаеме кој е следен
Лидерот на СДСМ ја поздрави изборната победа на Студентската листа во Србија како историски момент и испрати директна политичка порака до македонската јавност.
Претседателот на СДСМ, Венко Филипче, се огласи по изборните резултати во Србија, упатувајќи честитки до српските граѓани за, како што оцени, големата и историска победа.
Во објава на социјалните мрежи, Филипче порача дека изборниот исход во Србија претставува продолжение на политичките промени во регионот, притоа најавувајќи дека сличен развој на настаните очекува и во Македонија.
„Честитки до граѓаните на Србија за големата, историска победа! Како што најавивме, следува ослободување од криминалните структури на власта. Падна Орбан. Падна Вучиќ. Сите знаеме кој е следен“, напиша Филипче.
Со оваа порака, лидерот на опозициската СДСМ ги поврза политичките случувања во соседството со состојбите во Македонија, алудирајќи на можни промени и на домашната политичка сцена. Филипче упати и порака до македонските граѓани, нагласувајќи дека претстојниот политички период нема да биде лесен.
„На граѓаните на Македонија им порачувам дека нè чека борба, ни малку лесна, затоа што се бориме против остатокот од оваа криминална балканска група“, порача претседателот на СДСМ.
Покрај политичките пораки, Филипче изрази очекување дека Македонија и Србија ќе продолжат да развиваат блиски и пријателски односи.
„Очекувам Србија и Македонија да градат најдобри можни односи, засновани на меѓусебно почитување и соработка“, истакна тој.
Неговата реакција доаѓа по изборните случувања во Србија, кои Филипче ги оцени како историска победа на граѓаните и сигнал за пошироки политички промени во регионот.
