ВОНЗЕМЈАНИ ВО МНТ Комедија што ги открива слабостите на општеството

Претставата „Вонземјани“, во режија на Васил Михаил и по текст на Игор Кузмановски, утревечер во 20 часот ќе се игра во Македонскиот народен театар (МНТ). Копродукцијата на продукцијата „Мана“ и МНТ досега имаше изведби во рамки на „Скопско лето“ и на фестивалот „Свети Јоаким Осоговски“ во Крива Паланка.

Авторот Игор Кузмановски вели дека основната идеја на текстот произлегла од прашањето дали губењето на љубовта, солидарноста и сочувството значи и губење на човечките особини. Преку комедија, тој сака публиката да се насмее, но и да размисли за насоката во која се движи општеството.

Режисерот Михаил ја опишува претставата како невообичаена комедија во која се испреплетуваат различни комични стилови, сатира и гротеска. Тој најави дека претставата ќе биде дел од репертоарот на МНТ, со планови за гостувања низ земјава и учества на фестивали.

Во претставата играат Нино Леви, Димитрина Мицкоска, Марија Новак, Наум Георгиевски и Димитар Паскоски. За Леви, проектот има и лично значење бидејќи со него одбележува 40 години професионална актерска дејност.

Актерката Марија Новак посочи дека преку приказната за петчлено семејство се прикажуваат пошироките слабости на општеството и нивното влијание врз семејните односи. Димитрина Мицкоска, пак, нагласи дека е особено горда што работи на текст од македонски автор, кој сериозните теми ги обработува со хумор.

Михаил истакна дека претставата е реализирана со ограничени финансиски средства, со поддршка од Министерството за култура и туризам и МНТ, упатувајќи апел за поголема поддршка на ваквите уметнички проекти.

Костимографијата е на Благој Мицевски, сценографијата на Дарко Дуковски, а тонската обработка на „Оскар продукција“.