ДАМЕ ГРУЕВ ВО ФОКУСОТ НА ОДБЕЛЕЖУВАЊЕТО ВО СОФИЈА 155 години од раѓањето и 120 од смртта

Македонскиот културно-информативен центар (КИЦ) во Софија в среда, на 21 октомври, ќе организира настан посветен на животот и делото на Даме Груев, по повод 155 години од неговото раѓање и 120 години од неговата смрт.

Настанот под наслов „Во светлината на слободата – за историското значење на Даме Груев“ ќе започне во 18:30 часот, а за историската улога на македонскиот револуционер ќе говори проф. д-р Михајло Марковиќ.

Од Македонскиот КИЦ посочуваат дека одбележувањето е можност за потсетување на историските околности во кои дејствувал Груев, неговиот придонес во организирањето на македонското револуционерно движење и значењето на неговото дело во колективното паметење.

Даме Груев е една од истакнатите личности во македонското револуционерно движење од крајот на XIX и почетокот на XX век. Како еден од основачите на Македонската револуционерна организација во Солун во 1893 година, имал значајна улога во нејзиното создавање, организациско зацврстување и ширење на нејзината мрежа.

Неговата дејност била насочена кон поврзување на луѓето околу идејата за организирана борба за слобода, а неговата посветеност и организациски способности оставиле трага во развојот на револуционерното движење.

Животот на Груев завршил во 1906 година на планината Петлец. Неговото дело и улогата во револуционерното движење продолжуваат да бидат предмет на историски истражувања и се дел од македонската историска меморија.

Од Македонскиот КИЦ нагласуваат дека зачувувањето на историското сеќавање подразбира не само навраќање кон минатото, туку и проучување и пренесување на историските искуства на идните генерации.

Со настанот во Софија, организаторите имаат цел да поттикнат интерес за животот, револуционерната дејност и историското наследство на Даме Груев, како и за пошироките процеси што го одбележале времето во кое живеел и дејствувал.