ОСУМ БАРАЊА ОД ЗАГРЕБ Хрватска поставува услови за европскиот пат на Црна Гора
На самитот на ЕУ се разговарало за забрзување на проширувањето, но Загреб има конкретни услови што Подгорица треба да ги исполни за да добие зелено светло за затворање на преговорите.
Хрватскиот премиер Андреј Пленковиќ ги информирал лидерите на земјите-членки на Европската Унија за осум барања до Црна Гора, кои, според Загреб, треба да бидат решени пред земјата да добие согласност за завршување на пристапните преговори.
Интервенцијата на Пленковиќ се одразила и врз формулацијата на заклучоците за Црна Гора. Во споредба со претходниот нацрт, конечниот текст бил малку изменет, а од него биле отстранети временските рокови.
Ова укажува дека, и покрај поддршката за проширувањето на ЕУ, напредокот на земјите-кандидатки и натаму зависи од политичките договори и исполнувањето на конкретните услови. Германскиот канцелар Фридрих Мерц изјави дека на самитот во четвртокот се водела конструктивна дискусија за Црна Гора, со акцент на прашањето колку брзо земјата би можела да стане членка на Унијата.
„Сакаме да покажеме дека Европската Унија е сè уште подготвена да прими нови членови. Европската Унија не е затворена продавница, туку е отворена за сите европски земји што ги исполнуваат условите“, порача Мерц.
Неговата изјава ја нагласува подготвеноста на Берлин за продолжување на процесот на проширување, но истовремено ја потенцира потребата кандидатките да ги исполнат условите за членство. На состанокот се разговарало и за пристапните процеси на Украина и Молдавија. Според Мерц, следниот чекор треба да биде отворање на сите преговарачки кластери со двете земји.
Дискусијата се одвива во период кога ЕУ настојува да го обнови моментумот на проширувањето, но различните ставови на земјите-членки и билатералните прашања и понатаму можат да влијаат врз динамиката на преговорите.
