БЕЗ ЗАСТОИ НА ПАТИШТАТА И ГРАНИЦИТЕ – АМСМ со предупредување до возачите

Сообраќајот на државните патишта низ Македонија утрово се одвива непречено, по суви коловози, информира Автомото сојузот на Македонија (АМСМ).

Интензитетот на сообраќајот надвор од градските средини е умерен, додека на граничните премини, од македонска страна, нема подолги задржувања за влез и излез од државата.

Од АМСМ апелираат до возачите да ја приспособат брзината според условите на патот, да ја почитуваат сообраќајната сигнализација и внимателно да управуваат со возилата. Ова посебно се однесува за делниците Катланово – Велес, Маврово – Дебар – Струга, Виница – Берово и Кочани – Делчево.

Посебна претпазливост се препорачува на патните правци што минуваат низ котлини, речни долини и клисури, каде што постои опасност од појава на одрони.

Според сезонскиот режим на сообраќај, од 15 април патниот правец Охрид – Ресен, кој минува низ Националниот парк Галичица, е отворен за сите видови возила со тежина до 3,5 тони.

Од АМСМ потсетуваат дека почитувањето на сообраќајните правила и приспособувањето на брзината се клучни за безбедно патување.