ТРАМП СЕ ДОГОВОРИ СО ПУТИН ЗА ДИЗЕЛ Па побара нов претседател на Украина
Вашингтон најави увоз на руски дизел за намалување на цените на горивата, а Зеленски предупреди дека дополнителните руски приходи ќе ја финансираат војната.
Американскиот претседател Доналд Трамп изјави дека Украина треба да добие нов претседател, оценувајќи дека Володимир Зеленски не направил доволно за да се стави крај на војната со Русија. Тој, исто така, го обвини украинскиот лидер дека украинските напади врз руската енергетска инфраструктура придонесуваат за проблемите на светскиот пазар и високите цени на дизелот во САД, објави Асошиејтед прес (АП).
„Зеленски изгуби 30 проценти од својата земја, а повеќе од еден милион луѓе од двете страни учествуваа во војната, со повеќе од два милиони мртви. Тоа е војна што никогаш не требаше да се случи. Мислам дека е време Украина да добие нов претседател“, изјави Трамп.
Тој повтори дека војната немало да започне доколку бил претседател на САД во 2022 година. Изјавите на Трамп дојдоа еден ден откако тој објави договор со рускиот претседател Владимир Путин за увоз на руски дизел, со цел да се ублажи притисокот од високите цени на горивата во САД пред изборите за Конгресот.
Според Трамп, Русија треба веднаш да испорача повеќе од 300.000 тони дизел, а потоа и дополнителни количества во наредните месеци. Договорот претставува значителен пресврт во американската политика кон Москва, која е под санкции поради инвазијата врз Украина.
Украинскиот претседател Володимир Зеленски остро реагираше на договорот, предупредувајќи дека дополнителните приходи од извозот на енергенси ќе ѝ овозможат на Русија да ја финансира војната. Неговата реакција следеше по рускиот напад врз украинскиот регион Запорожје, во кој, според наведените извештаи, загинале најмалку 20 лица, меѓу кои три деца, а најмалку 18 биле повредени.
„Денес, Русија изрази благодарност за укинувањето на санкциите за извозот на дизел со фрлање пет лизгачки бомби врз станбени згради во Запорожје“, напиша Зеленски на социјалната мрежа X.
Тој оцени дека Москва секое намалување на притисокот го толкува како дозвола за продолжување на нападите.
„Изборот на Русија е војна“, порача Зеленски, повикувајќи ги САД, европските држави и другите сојузници да ја ограничат способноста на Москва да продолжи со воените операции.
Договорот предизвика загриженост кај европските сојузници на Украина, кои предупредуваат дека приходите од руската енергетика можат дополнително да ја зајакнат Москва. Шведскиот премиер Улф Кристерсон изрази жалење поради договорот, нагласувајќи дека енергетските приходи се важен извор за финансирање на руската воена машинерија. Тој најави и нов европски пакет санкции насочени кон рускиот воено-индустриски комплекс.
Германија соопшти дека останува посветена на санкциите против Русија и на поддршката за Украина. Полскиот министер за надворешни работи Радослав Сикорски, пак, постави прашање дали Русија ќе може да ги испорача договорените количества дизел, имајќи ја предвид штетата предизвикана од украинските напади врз руските рафинерии.
Одлуката на Трамп предизвика незадоволство и меѓу дел од жителите на украинската престолнина. Дваесет и шестгодишниот Олександр Петренко изјави дека американскиот претседател повторно го покажал своето вистинско лице, оценувајќи дека за него цените на горивата се поважни од уништувањето на украинските домови.
Договорот за дизел доаѓа и покрај тоа што Трамп минатиот месец потпиша закон за сеопфатни санкции против Русија, чија цел е ограничување на приходите од нафта и гас што Москва ги користи за финансирање на војната против Украина.
