ПЕТ ПРАВИЛА КОИ ВАЖАТ ЗА СИТЕ, А ЕДНО ЗНАЧИ – НЕ ИГРАШ Мурињо веднаш воведе строга дисциплина во соблекувалната на „кралскиот клуб“
Португалецот воведе строг режим во соблекувалната на „кралскиот клуб“, а правилата важат и за најголемите ѕвезди.
Жозе Мурињо ова лето се врати на клупата на Реал Мадрид, а претседателот на клубот Флорентино Перез од искусниот португалски стратег очекува да внесе ред во соблекувалната и да ги намали тензиите во тимот. Мурињо, според замислата на Перез, треба да го намали притисокот врз младите шпански тренери Чаби Алонсо и Алваро Арбелоа, кои минатата сезона се соочуваа со големи очекувања и критики.
Почетокот на сезоната е одличен. Реал Мадрид ги освои сите девет бодови во првите три кола од Ла Лига, а тимот на теренот остави впечаток на добро организирана и дисциплинирана екипа. Англискиот портал „talkSPORT“ пишува дека Мурињо веќе вовел неколку строги правила во клубот, со кои сака да воспостави поголема дисциплина меѓу фудбалерите.
Петте правила на Мурињо:
1. Доцнењето на тренинг има непосредна последица
Фудбалерот кој ќе задоцни на тренинг веднаш се издвојува од групата и мора да продолжи со индивидуална работа во теретана.
2. Доцнењето значи и пауза од натпреварите
Според правилата на Мурињо, играчот кој ќе задоцни на тренинг автоматски не настапува на следниот натпревар.
3. Нема класични парични казни
Португалецот не сака да користи парични казни за доцнење на тренинзи или состаноци. Неговото образложение е дека високите плати на фудбалерите ги прават ваквите казни неефикасни. Како пример се наведува Килијан Мбапе, чија заработка е над 600.000 евра неделно.
4. Повредените играчи се под клупски надзор
Фудбалерите кои се повредени мора да го спроведуваат процесот на рехабилитација под надзор на клупскиот медицински тим и терапиите да ги добиваат во просториите на клубот. Приватните терапии се забранети.
5. Исхраната е строго контролирана
Сите играчи имаат однапред пропишана диета од клубот. Наместо секој фудбалер самостојно да одредува што ќе јаде, исхраната е дел од системот за подготовка и одржување на физичката форма.
Со овие мерки Мурињо уште од стартот испраќа јасна порака дека во неговиот Реал Мадрид дисциплината и почитувањето на правилата ќе бидат подеднакво важни како и резултатите на теренот.
