МОРА ДА ИЗГЛЕДАТЕ НА ОДРЕДЕН НАЧИН Жените на Трамп откриваат каков притисок трпат во Белата куќа

Жени кои работат во најблискиот круг на американскиот претседател Доналд Трамп зборуваат за високите барања и притисокот со кој, според нив, се соочуваат неговите соработнички. Во фокусот не е само професионалната работа, туку и изгледот, начинот на облекување и постојаната достапност.

Неколку жени од MAGA движењето изјавиле за „Дејли меил“ дека ја разбираат одлуката на прес-секретарката на Белата куќа, Керолин Ливит, да се повлече од функцијата. Иако таа како главна причина ја навела желбата да поминува повеќе време со своите мали деца, извори тврдат дека заморот од интензивното темпо и барањата на Трамп исто така одиграле улога.

Според нивните сведоштва, жените во кругот на претседателот се соочуваат со постојан притисок да исполнат одредени стандарди за изглед. Тоа, како што наведуваат, може да значи секојдневно фенирање, редовни козметички третмани, па дури и ботокс.

„Може да биде целосно исцрпувачки“, изјавила една од жените за „Дејли меил“.

Таа додава дека од жените се очекува да бидат исклучителни во работата, но истовремено да изгледаат и да се однесуваат на одреден начин.

„Ако сте жена, мора да изгледате на одреден начин, да се облекувате на одреден начин и да бидете достапни 24 часа на ден, бидејќи ова е претседател кој едвај спие“, рекла таа.

За специфичниот карактер на барањата на Трамп зборувала и Бланш Спрег, која во минатото била една од неговите менаџерки во периодот кога тој бил дел од високото општество во Њујорк. Таа се присетила дека Трамп знаел да бара веднаш да се реагира и на навидум најситни детали.

„Ме повика навечер и ме праша дали знаев дека има шише сок пред Трамп Плаза. Морав да најдам некого веднаш да го земе, бидејќи тој повторно ќе поминеше за да провери дали исчезнало“, раскажала Спрег.

Сепак, дел од неговите поддржувачи не сметаат дека токму Трамп е причината жените да посветуваат толку внимание на својот изглед. Според нив, станува збор за конкуренција меѓу самите вработени.

„Тој не ги принудува овие жени да се фенираат во шест часот наутро, да одат на пластична хирургија или да земаат лекови за слабеење“, изјавил еден од изворите.

Ливит не е единствената жена од најтесниот круг на Трамп која ја напуштила функцијата. Од почетокот на годината, според „Дејли меил“, заминале и директорката на Националното разузнавање Тулси Габард, државниот обвинител Пам Бонди, секретарката за внатрешна безбедност Кристи Ноем, секретарката за труд Лори Чавез-Деремер, заменик-секретарката за печат Абигејл Џексон и директорката за медиумски прашања Сони Џој Нелсон.

При објавувањето на заминувањето на Ливит, Трамп соопшти дека таа ќе продолжи да соработува со него во нова улога како „надворешен советник“, со задача да помогне во политичките активности и среднорочните избори.

Извори за „Дејли меил“ велат дека и покрај тоа што Ливит повеќе нема да стои зад говорницата во Белата куќа, Трамп најверојатно ќе продолжи редовно да ја консултира.

„Претседателот ѝ верува на нејзината проценка. Тој ја почитува нејзината одлука да поминува време со своите деца, но ќе продолжи да бара нејзино водство“, изјавиле изворите.