ШТО ГО ТРУЕ ГОСТИВАР Стотици заболени дневно, надлежните трагаат по причината
Епидемијата со стомачни тегоби не стивнува, а анализите треба да покажат дали проблемот е во водата или во друг извор.
Епидемијата на гастроентероколит во Гостивар сè уште не стивнува, а дневно се пријавуваат меѓу 250 и 300 нови пациенти со дијареја, повраќање и дехидратација. Поради сериозноста на состојбата, во општината е прогласена епидемија, додека Владата обезбедува по 50.000 литри бесплатна пакувана вода дневно, бидејќи водата од градскиот водовод останува забранета за пиење и подготовка на храна.
Надлежните институции сè уште не ја утврдиле точната причина за појавата. Министерот за здравство Сашо Клековски повика да не се носат предвремени заклучоци, а резултатите од проширените лабораториски анализи се очекуваат денес. Се испитуваат бактерии, вируси, паразити, тешки метали и други можни загадувачи.
Заболените се од Гостивар и околните населени места, што отвора сомнеж дека изворот на заразата не е поврзан со едно место или еден оброк. Во јавноста се споменуваат повеќе можни ризик-фактори, меѓу кои неодамнешните интервенции на водоводната мрежа и дезинсекцијата, но засега нема официјална потврда дека тие се причина за епидемијата.
