ПО ПОВЕЌЕДНЕВНИ КОМЕМОРАЦИИ ВО ИРАН Али Хамнеи погребан во Машхад
Иранскиот врховен лидер беше испратен со голема погребна церемонија во Машхад, додека толпата упатуваше остри политички пораки кон Вашингтон и Тел Авив.
Ајатолахот Али Хамнеи беше погребан во петокот рано наутро по локално време во неговиот роден град Машхад, на североистокот на Иран, со што завршија повеќедневните комеморации и погребни церемонии одржани во Иран и Ирак.
Последниот обред се одржа во молитвената сала на светилиштето Имам Реза во Машхад. Пред погребувањето, ковчегот беше пренесен околу гробницата на Имам Реза, како дел од традиционалните погребни ритуали.
Погребната молитва над телото на Хамнеи беше одржана во дворот на светилиштето, а потоа следеше приватна церемонија на која присуствувале членовите на неговото семејство. Молитвата ја предводеше неговиот најстар син Сејед Мостафа Хамнеи.
За време на поворката низ Машхад, присутните упатуваа политички скандирања, меѓу кои и „Смрт за Америка“ и „Смрт за Израел“, пренесуваат иранските медиуми.
Али Хамнеи беше убиен на 28 февруари, на почетокот на воениот конфликт меѓу САД, Израел и Иран. Во нападот, според иранските медиуми, загинаа и неколку членови на неговото семејство.
Неговиот син Моџтаба Хамнеи потоа ја презеде функцијата врховен лидер на Иран, но оттогаш не се појавил во јавноста и не присуствувал на погребните церемонии.
