ДАЛИ ОВА Е ПОЧЕТОК НА КРАЈОТ Експерти алармираат за распаѓање на руската економија
Нафтата носи пари, но не ја спасува економијата.
Домашната економија на Русија, според анализи на меѓународни медиуми и експерти, сè појасно се обликува како нестабилна „двојна структура“, во која воениот сектор расте на сметка на цивилните гранки. Масовните државни трошоци поврзани со војната во Украина довеле до забавување и стагнација во невоените индустрии, малопродажбата и јавните услуги.
Првичниот економски поттик од зголеменото воено производство постепено слабее, при што се откриваат длабоки структурни дисбаланси. За да го контролира растечкиот буџетски дефицит, Кремљ, според истите анализи, ги зголемува даноците и се потпира на поголемо домашно задолжување, што дополнително го оптоварува приватниот сектор и го ограничува претприемништвото.
Економисти предупредуваат дека зголемените трошоци за капитал, работна сила и суровини ја насочуваат економската активност речиси целосно кон воено-индустрискиот комплекс, додека цивилната економија се соочува со притисок од високи каматни стапки и регулаторни ограничувања.
Иако повисоките цени на енергенсите привремено ги зголемуваат приходите од извоз на нафта и гас, тие не успеваат да ги решат подлабоките макроекономски проблеми. Според проценките на експерти од меѓународни институти, за одржување на воените трошоци државата ќе мора дополнително да мобилизира човечки и материјални ресурси, што може да доведе до понатамошно ограничување на пазарните слободи.
Во рамки на буџетската политика, се укажува на растечки дефицит и значително зголемување на расходите за одбрана и безбедност, кои достигнуваат речиси 40 проценти од државните трошоци. Истовремено, првичните проекции за буџетскиот дефицит се надминати, што ја зголемува потребата од замрзнување или прераспределба на дел од планираните расходи.
Дополнително, финансискиот систем покажува знаци на нестабилност, со раст на нефункционалните кредити и проблеми во ликвидноста. Банките се обидуваат да ги прикријат ризиците преку реструктуирање на долговите, додека доцнењата во плаќањата меѓу компаниите создаваат дополнителен притисок врз домашната трговија.
Сето ова се одразува и врз пошироката политичко-економска слика, при што војната и економските ограничувања меѓусебно се засилуваат. Во меѓувреме, украинските напади со дронови врз инфраструктурни цели во Русија дополнително го оптоваруваат енергетскиот сектор и придонесуваат за зголемување на економската нестабилност.