ПРЕСВРТ НА ФИНАНСИСКАТА МАПА Хонг Конг ѝ ја „украде“ круната на Швајцарија за глобалното богатство
Азиските пазари стануваат новиот центар на светското инвестициско движење.
Хонг Конг за првпат ја надмина Швајцарија како најголем светски центар за прекугранично управување со богатство, поттикнат од силниот прилив на капитал од континентална Кина.
Според проценките на Boston Consulting Group, кинеските менаџери на богатство во 2025 година управуваат со околу 2,9 трилиони долари меѓународни средства, од кои околу 60% доаѓаат од континентална Кина. Аналитичарите очекуваат овој тренд да продолжи и до крајот на деценијата јазот меѓу Хонг Конг и Швајцарија да се зголеми на речиси 600 милијарди долари.
Растот на Хонг Конг е поврзан со оживувањето на пазарот на капитал и зголеменото финансирање на компании во странство, како и со силната позиција на Кина во индустрии како електрични возила. Во исто време, глобалните инвеститори сè повеќе ги распределуваат средствата во повеќе јурисдикции поради геополитички ризици, санкции и политичка нестабилност.
Експертите наведуваат дека се формираат два големи центри на глобалното богатство: Азија со Хонг Конг и Сингапур, и западен блок предводен од Швајцарија, ОАЕ и САД.
Иако Швајцарија останува клучен финансиски центар, особено за азиски клиенти, дел од банкарите предупредуваат дека земјата мора поактивно да ја брани својата позиција, а не само да се потпира на традиционалната стабилност.
Во меѓувреме, центри како Дубаи и Сингапур исто така забележуваат раст, но сè уште значително заостануваат зад Швајцарија и Хонг Конг во обемот на прекугранично богатство.