ТРАГЕДИЈА НА СКОПСКАТА ОБИКОЛНИЦА Загинаа четири лица, меѓу нив и оперскиот баритон Ристе Велков и неговиот син

Трагедија ја потресе Македонија откако четири лица го загубија животот во тешка сообраќајна несреќа што синоќа се случи на скопската обиколница, меѓу надвозникот Визбегово и клучката Мирковци. Меѓу загинатите се и баритонот и првенец на Националната опера и балет, Ристе Велков, како и неговиот 20-годишен син, потврдија од НОБ.

Според информациите од Министерството за внатрешни работи, несреќата била пријавена околу 23 часот во СВР Скопје. Товарно возило влекач „ман“ со полуприколка и косовски регистарски ознаки, управувано од 76-годишен државјанин на Косово, изгубило контрола, ја пробило металната ограда и преминало во спротивната насока, каде директно се судрило со патничко возило „бмв“ со скопски таблички.

По силниот удар избувнал пожар, при што автомобилот и кабината на камионот целосно изгореле. Интервенирала Бригадата за противпожарна заштита на Скопје, која го изгаснала огнот.

На местото на несреќата животот го загубиле возачот на „бмв“-то, Р.В. (51), сопатниците А.В. (20) и П.М. (20) од Скопје, како и уште едно лице чиј идентитет сè уште не е официјално утврден. Смртта ја констатирала екипа на Итната медицинска помош, а по наредба на јавен обвинител телата се предадени на обдукција.

По налог на обвинителството, возачот на товарното возило е лишен од слобода и задржан во полициска станица. По целосното расчистување на случајот ќе биде поднесена соодветна пријава.

Поради увидот, сообраќајот на обиколницата бил пренасочуван од 23:10 до 05:00 часот, по што повторно бил нормализиран.

Ристе Велков беше еден од најпрепознатливите оперски баритони во земјава. Роден во 1975 година во Скопје, како солист-првенец на Национална опера и балет остави длабока трага на македонската оперска сцена. Во текот на кариерата реализираше 26 улоги, а публиката особено го памети по настапите во оперите „Набуко“, „Риголето“, „Магбет“ и Травијата.