СДСМ ОБВИНУВА, ВЛАДАТА НЕГИРА Пари за кафеани или за бифиња?

Портпаролката на СДСМ, Богданка Кузеска, денеска на прес-конференција излезе со обвинувања на сметка на Владата, тврдејќи дека во првите четири месеци од годината се потрошени над 30.000 евра од државниот буџет на скапи оброци во луксузни скопски ресторани.

Според Кузеска, речиси сите министри биле дел од ова „разметливо трошење“, при што одредени сметки достигнувале и до 3.000 евра. Таа ги повика медиумите и јавноста да ги разгледаат податоците објавени на платформата „Отворени финансии“, каде, како што рече, се потврдени овие исплати.

„Почитувани министри, малку ли ви беа папајата, аспарагусот и егзотичните набавки од 35.000 евра?“, праша Кузеска, алудирајќи на претходни спорни набавки.

Таа особено ги посочи, како што ги нарече, „главни кафанџии“ меѓу министрите, меѓу кои Тимчо Муцунски, Филков, како и министерот за култура Христијан Љутков, кој, според неа, троши баснословни суми во ресторани додека вработените во културата се соочуваат со неисплатени плати.

СДСМ го обвинува ВМРО-ДПМНЕ за арогантен елитизам и тотално отуѓување од народот, наведувајќи дека „луксузните оброци, приватните авиони и егзотичните набавки“ станале секојдневие во владеењето на актуелната гарнитура.

Од Владата ги отфрлија тврдењата на СДСМ, оценувајќи ги како политички манипулации и дезинформации. Во нивната реакција се наведува дека трошоците кои се споменуваат се однесуваат на бифињата во рамките на министерствата, кои ги користат вработените, а не министрите. Според официјалниот став, услугите од бифињата се финансираат од страна на самите вработени и не се на товар на буџетот.

Дополнително, од Владата потсетија дека токму за време на владеењето на СДСМ, ваквите услуги ги обезбедувала компанијата „Концепт“ од Струмица, која, како што наведуваат, била поврзана со контроверзии.

„Времињата кога министрите од СДСМ користеа владини авиони за шопинг во Ниш и Солун се завршени. Денес имаме транспарентност и рационално управување со јавните средства“, се вели во соопштението.

Владата апелираше до јавноста да биде претпазлива кон, како што рекоа, „неконструктивните и дезинформирачки“ тврдења на опозицијата, и да се насочи кон суштински дебати за иднината на државата.

Дебатата околу трошењето на јавни средства продолжува да биде предмет на остри партиски судири, со длабоки поделби околу перцепцијата за отчетност и одговорност на носителите на јавни функции.