ФИФА ПРЕДИЗВИКА ХАОС – Откажани илјадници хотелски резервации во Филаделфија за Мундијалот 2026
Навивачите се во недоумица откако ФИФА дејствуваше без образложение, откажувајќи околу 2.000 соби во центарот на градот.
ФИФА откажа илјадници хотелски резервации во Филаделфија, првично резервирани за Светското првенство 2026, без да ги образложи причините, објавува „The Independent“.
Според Здружението на хотелиери на Голема Филаделфија, станува збор за околу 2.000 откажувања, претежно во четири хотели во центарот на градот. Претседателот на здружението, Ед Гроуз, за „ABC 6“ изјави дека ФИФА дејствувала согласно условите од договорот и дека нема да се соочи со казни.
Гроуз истакна дека слични откажувања се случуваат и во други американски градови-домаќини, но советуваше навивачите кои веќе имаат резервации да не ги откажуваат. Тој нагласи дека собите повторно ќе бидат достапни и ќе им се нудат на навивачите кои сакаат да престојуваат во Филаделфија, додавајќи дека две конвенции ќе се одржат приближно во исто време со натпреварите, па пополнетоста на хотелите нема да претставува проблем.
Веста доаѓа по извештај од почетокот на март дека ФИФА откажала 40% од хотелските резервации во Мексико Сити. Светското првенство 2026, кое ќе се одржи во градови низ САД, Мексико и Канада, се очекува да привлече меѓу пет и 6,5 милиони навивачи.
