НА 86 ГОДИНИ – Почина Чак Норис
Семејството потврди дека починал во мир, опкружен со најблиските.
Чак Норис, легендарниот мајстор на боречки вештини и икона на акционите филмови и култната серија „Вокер, Тексашкиот ренџер“, почина на 86-годишна возраст.
Семејството потврди дека Норис починал во четврток на Хаваи, еден ден откако бил хоспитализиран. Во соопштението тие истакнаа дека бил опкружен со најблиските и заминал во мир.
„За светот, тој беше боречки уметник, актер и симбол на сила. За нас, тој беше посветен сопруг, грижлив татко и дедо, неверојатен брат и срцето на нашето семејство“, се наведува во емотивната порака.
Семејството додаде дека животот на Норис бил воден од вера, цел и непоколеблива посветеност кон луѓето што ги сакал. Преку својата работа, дисциплина и човечност, тој инспирираше милиони ширум светот. Тие изразија благодарност за поддршката и молитвите од обожавателите и апелираа за приватност во овие тешки моменти.
Пред само неколку дена, на 10 март, Чак Норис го прослави својот 86-ти роденден со објава на социјалните мрежи на која се бори со противник на Хаваи, порачувајќи:
„Не стареам… Напредувам“.
Иако веќе не беше активен во глумата, Норис остана популарен на интернет, каде што обожавателите продолжија да споделуваат мемиња за неговата легендарна сила.
Роден во Оклахома во 1940 година, Норис служел во воздухопловните сили на САД од 1958 до 1962 година. Бил двапати женет и имал пет деца, меѓу кои актерот Мајк Норис и возачот на НАСКАР Ерик Норис.
