РАЗЛИЧНИ РЕАКЦИИ – Србија ги штити резервите, Шпанија воведува даночни олеснувања за гориво

Претседателот на Србија, Александар Вучиќ, се состана со претставници на надлежните министерства и институции за да разговараат за состојбата на пазарот на горива и државните резерви. Цените на нафтата достигнаа 112 долари за барел на глобално ниво, поради извештаите на иранските медиуми за напад врз објект во најголемото светско поле за природен гас.

Рано утрово во Азија, цената на суровата нафта тип Брент порасна за повеќе од пет проценти во однос на вторникот, јави Би-би-си. Додека цените на енергијата растат, Вучиќ ги повика граѓаните да не паничат.

„Имаме околу 270.000 тони нафта во државните резерви, што е најмногу во регионот“, изјави тој на 19 март. Претседателот додаде дека „големиот проблем е недостигот на места каде што може да се купи нафта“.

Вучиќ им порача на граѓаните да не паничат и да не се грижат и да не купуваат во канистри бидејќи Србија има огромни резерви на нафта.

„Нема да ги трошиме девизните резерви во пари или злато… Но, не можам да гарантирам што ќе се случи за еден, два или три месеци.“

Истиот ден, Владата на Србија ја продолжи привремената забрана за извоз на нафта и нафтени деривати за моторни возила, која првично важеше до 19 март, а сега е продолжена до 2 април. Забраната се однесува на дизел, бензин и сурова нафта. Министерка за рударство и енергетика, Дубравка Ѓедовиќ Хандановиќ, додаде дека како дополнителна мерка се ослободуваат 40.000 тони дизел од резервите за заштита на пазарот.

Во меѓувреме, Шпанија презема различен пристап, воведувајќи пакет итни даночни олеснувања за да ја намали цената на горивата. Акцизите се намалуваат, а ДДВ-то за гориво се преполовува од 21 на 10 проценти, што би можело да донесе заштеда од 30 до 40 центи по литар за возачите. Премиерот Педро Санчез, кој е критичар на нападите на САД и Израел врз Иран, најави и пакет помош за најранливите сектори, истовремено истакнувајќи ја улогата на обновливите извори на енергија за ублажување на економската изложеност.

Различните реакции на земјите покажуваат како моменталната криза со снабдувањето со нафта и деривати, предизвикана од конфликтот на Блискиот Исток и поморската блокада во Ормускиот теснец, влијае врз глобалниот пазар.