ПОРАКА ОД МАКРОН – Франција останува надвор од операциите во Ормускиот теснец
Франција ќе работи на коалиција за обезбедување на теснецот откако ќе се стабилизира безбедносната ситуација
Францускиот претседател, Емануел Макрон, изјави дека Франција нема да учествува во операции за деблокирање на Ормускиот теснец, и покрај тврдењата на американскиот претседател Доналд Трамп дека Париз е подготвен да помогне.
Трамп, на настан во Белата куќа, рече дека разговарал со Макрон, оценувајќи го со „осум од 10“ за неговиот став за повикување на сојузниците да го деблокираат теснецот. Тој му предложи на Макрон да се придружи на напорите поддржани од САД.
„Ние не сме страна во конфликтот и затоа Франција никогаш нема да учествува во операции за отворање или ослободување на Ормускиот теснец во сегашниот контекст“, рече Макрон на почетокот на состанокот на кабинетот, каде се разговараше за конфликтите на Блискиот Исток.
Франција, сепак, продолжува да работи на составување коалиција за обезбедување на Ормускиот теснец откако безбедносната ситуација ќе се стабилизира, без да се вклучуваат САД, соопштија француски претставници, објави АФП.
